Heildar skrifstofu- og stjórnunarkostnaður Birtu lífeyrissjóðs nam 1.013 milljónum króna á árinu 2024 en árið 2023 nam hann 907 milljónum króna. Rekstrarkostnaður sjóðsins hækkaði á föstu verðlagi um 6,8% á milli ára.
Markvisst er dregið úr kostnaði þar sem hægt er til að hagræða í rekstri og áhersla lögð á kostnaðarárvekni alls starfsfólks.
Rekstrarkostnaður sem hlutfall af meðalstöðu hreinnar eignar til greiðslu lífeyris stóð í stað á milli ára og var 0,15% á árinu 2024 sem og á árinu 2023. Rekstrarkostnaður sem hlutfall af iðgjöldum var 4,01% á árinu 2024 en 3,66% árið áður. Frá stofnun Birtu lífeyrissjóðs í lok árs 2016 hefur hlutfall rekstrarkostnaðar af meðalstöðu hreinnar eignar til greiðslu lífeyris lækkað úr 0,22% í 0,15%. Sjóðurinn hefur gegnum árin lagt áherslu á og markvisst dregið úr kostnaði þar sem mögulegt er innan skynsamlegra marka og spilar hugarfar og samstarf starfsfólks þar stóran þátt.
Í skýringu 7 í ársreikningi má sjá sundurliðun á skrifstofu- og stjórnunarkostnaði sjóðsins.
meðalstaða eigna
Aðkeypt tölvuþjónusta árið 2024 nam 5,4 milljónir króna en var 5,2 milljónir króna árið á undan. Kostnaður við rekstur upplýsingakerfa nam 160 milljónum króna á árinu 2024 en var 158 milljónir árið 2023. Öryggi í rekstri upplýsingatækni er stór og ört stækkandi þáttur í rekstri sjóðsins. Sívaxandi ógnir við net- og gagnaöryggi í upplýsingatækniumhverfi kalla á það að brugðist sé við og varnir efldar. Sjóðurinn leggur þunga áherslu á upplýsingatækniöryggi og að mæta nýjum ógnum með auknum vörnum. Vel ígrundaðar fjárfestingar á sviði öryggisvarna eru því mikilvægar og eru ákvarðanir þar að lútandi teknar með árvekni og skynsemi að leiðarljósi. Starfsfólk sjóðsins fær reglulega þjálfun í að greina hættur tengdar upplýsingatækni og bregðast rétt við þeim, þegar ógn steðjar að.
Gjöld til umboðsmanns skuldara lækkuðu um 7,28%, eftirlitsgjöld til Fjármálaeftirlitsins hækkuðu um 10,04% á milli ára og greiðslur til Landssamtaka lífeyrissjóða hækkuðu um 13,62%.
Fjöldi stöðugilda á árinu var 28,8 og nam heildarfjárhæð launa 610 millj. kr., þar af voru launatengd gjöld 114 millj. kr. samanborið við 543 millj. kr. á árinu 2023 en þar af voru launatengd gjöld 101 millj. kr.
Annar rekstrarkostnaður nam 144 milljónum króna á árinu 2024 samanborið við 133 milljónir króna árið 2023 og jókst því um 8,75%. Hækkunin skýrist að stærstum hluta af sérstakri tryggingafræðilegri úttekt sem unnin var á árinu.
Lögfræðikostnaður jókst m.a. vegna umfangsmikilla verkefna sem unnið var að í samstarfi við aðra sjóði. Sjálfbærnivegferð sjóðsins verður fyrirferðameiri í rekstri hans með hverju árinu í samræmi við auknar kröfur í málaflokknum. Einnig hefur sjóðurinn aukið við áskriftir að mikilvægum gagnaveitum á sviði áhættu- og eignastýringar.
Kostnaðarárvekni verður áfram mikilvæg í rekstri sjóðsins og stöðugt leitað leiða til að hagræða og draga úr kostnaði. Sjóðurinn stækkar með auknu álagi sem leitast er við að mæta með hámörkun framleiðni á hvert stöðugildi innan sjóðsins. Framleiðniaukinn sem byggður er á þróun framleiðni innan starfseminnar er drifinn áfram með einföldun vinnuferla, nýjum tæknilausnum og sjálfvirkni sem svo skilar sér í hagkvæmari rekstri.