Við höfum sett okkur þjónustustefnu sem við vinnum eftir.
Við leggjum áherslu á að veita sjóðfélögum framúrskarandi þjónustu. Starfsfólk okkar býr yfir sérfræðiþekkingu hvert á sínu sviði og leggur mikið upp úr því að veita sjóðfélögum faglega, gagnlega og góða leiðsögn.
Þjónustustig sjóðsins er hátt og þjónustan á skrifstofu sjóðsins fær hæstu einkunn sjóðfélaga. Grunnur var lagður að sérstökum, reglubundnum þjónustukönnunum á árinu 2024, sem fara í fulla virkni á árinu 2025 og munu auka innsýn okkar í upplifun sjóðfélaga og annarra viðskiptavina. Að baki hins góða árangurs í þjónustu liggur markviss vinna og fræðsla til starfsmanna um að veita framúrskarandi þjónustu, sama hvort hún er veitt á skrifstofu sjóðsins eða með rafrænum lausnum. Við leggjum áherslu á að bjóða upp á notendavænar rafrænar lausnir sem sjóðfélagar geta nýtt sér þegar þeir sækja upplýsingar um stöðu sína hjá sjóðnum, sækja um lífeyri, séreignarsparnað eða lán.
Á árinu 2024 lauk uppsetningu og innleiðingu á nýju viðskiptamannakerfi innan sjóðsins. Kerfið snýr að viðskiptatengslum okkar og sjóðfélaga okkar. Ferli í þjónustu og markaðssetningu hefur verið bætt og virði viðskiptasambands okkar við sjóðfélaga aukið, báðum aðilum í hag. Í kerfinu höldum við utan um öll samskipti við fyrrverandi, núverandi og verðandi sjóðfélaga okkar og viðskiptavini. Með skráningu samskipta við sjóðfélaga og alla þá er hafa samband við sjóðinn í viðskiptamannakerfi verður til dýrmætur grunnur upplýsinga sem opnar möguleika á enn betri yfirsýn starfsfólks og í framhaldinu innihaldsríkari þjónustu.
1.791 sjóðfélagi heimsótti skrifstofu Birtu á árinu, en fjölmargir sjóðfélagar nýttu sér rafræna þjónustu, höfðu samband símleiðis eða með tölvupóstsamskiptum.
Til að þjónusta sjóðfélaga sem best er stöðugt unnið að endurbótum á vefsíðunni, birta.is.
